Mahabang taon na ang lumilipas, mahal

Napapadalas nanaman ang pagdalaw mo sa isip ko. Ikaw ang unang ala-alang tumatangan sa akin sa umaga. Ala-ala mo rin ang kasama ko bago ako sunduin ng antok sa madaling araw. Kumusta ka na, dati kong sinisinta?
 
Gusto kong itanong ito sa’yo, ngunit ayokong kausapin ka. Ayokong magtagpi ng mga pangungusap na magdudugtong sa naputol nating pag-iibigan. Gusto lang kitang kumustahin. Sana, hanggang ngayon, nasasaktan ka pa rin.
 
Isinusumpa mo na ba ang hamog ng madaling araw? Mahabang taon na ang lumilipas, mahal, simula ng huli tayong magbatuhan ng sulyap sa pagitan ng mga kumot. Wala pa rin bang nakapupuno sa puwang na binitbit ko? Mahabang taon na ang nagdaan, mahal, simula ng iniwan kong basag ang damdamin mo.
 
Galit ka pa rin ba sa akin? O tuluyan mo nang nakalimutan kung sino tayo dati? Tayong mga kawatan, mga walang pinaniniwalaan kundi ang marurupok na mga pangakong inialay natin sa altar ng paghahangad.
 
Kanina, may nakita akong iika-ikang ibon at naisip nanaman kita. Magaling na ba ang pakpak mong minsang kong binali ng todo-todo? Nakakalipad ka na ba ulit? Nakakalipad ka na ba ulit ng malayo? Masusundan mo na ba ako para maglibang at maghiganti?
 
Kung hindi mo pa kaya, ako ang babalik. Tatagpuin ulit kita, mahal, upang maipagpatuloy natin ang nasimulan. Sana, kahit papaano, naghilom na ang pait na dinala ko dahil katulad ng maraming pagkakataon dati,
 
sa ibabaw ng kumot
sa pagitan ng malalalim na buntong hininga
nangungulilang hamog sa bintana
at palihim na mga sulyap,
huhulmahin ko ang mga bagong pangakong
tatahi sa damdamin mong
muli kong paduduguin
sa altar ng mga
hinahangad.
 
Mahabang taon na ang lumilipas, mahal.
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s